ઈનબોક્ષમાં ‘પેન્સિલ વડે અદભૂત કળા’ નામની ઈમેઈલ જોઈને મને પણ થયું હતું કે હશે કંઇક પેન્સિલ સ્કેચ વિશે, પણ જ્યારે ઈમેઈલ ખોલીને જોઈ તો મારા મનનાં દરવાજા પણ ખૂલી ગયા!
આ કળા એટલે અણીદાર પેન્સિલ અને સપાટ કાગળ પર રચાતી ચિત્રકળાની વાત નથી પણ આતો પેન્સિલો વડે રચાતા ત્રિપરિમાણ શિલ્પકળાની વાત છે, તે પણ પેન્સિલ ઘસ્યા વગર!
દક્ષિણ આફ્રિકાના જોહનિસબર્ગમાં જન્મેલી જેનિફર માસ્ટર નામની ફાઈન આર્ટની સ્નાતક પેન્સિલ વડે અદભૂત શિલ્પ બનાવવાની માહેર છે. હજારો પેન્સિલો લઈ તેને એક એક ઈંચ જેટલી કાપી, તેમાં કાણાં પાડી, તેને અણીદાર બનાવી તેમને મણકાની જેમ દોરા કે તાર વડે ગૂંથણી કરી કુદરતી આકારો અને પ્રાણીઓના જીવંત શિલ્પ બનાવે છે. પેન્સિલ એટલે રચનાત્મકતા, સ્ફૂરણા, મથામણ, સંભાવના અને આનંદ એમ તેણી કહે છે. પેન્સિલ સિવાય ખીલી, પિન, મણકા વગરેમાંથી પણ અદભૂત શિલ્પ બનાવે છે! ઘણા વર્ષોથી તે પોતાની આ ‘સાળ વગરની વણવાની’ કળા શીખવે પણ છે. વધુ હું શું લખું? જાતે જોઇલો તેની વેબસાઈટ પર!